A mostra cooperativa

A mostra de produtos e servizos cooperativos organízase de xeito complementario e simultáneo á celebración dos encontros e nas mesmas instalacións, permanecendo aberta os días 5, 6 e 7 de xullo. Con ela procurarase a visibilización das actividades das cooperativas galegas e das invitadas aos encontros, mediante a exposición dos seus produtos e servizos, así como de toda aquela información que resulte de interese.

A mostra estará enfocada a facilitar as relacións de intercooperación e de carácter comercial, así como a posibilitar o establecemento de canles de comunicación e colaboración entre todos os participantes e visitantes.

Está prevista a presenza de cooperativas a título individual, de asociacións de cooperativas, de organizacións e entidades asistentes aos encontros, así como presenza de carácter institucional.

As entidades que desexen participar na mostra, poden facelo a través de múltiples medios, desde a achega de información sobre as súas propostas e actividades para a incorporación á exposición colectiva, ata a instalación dun punto de atención onde poderán presentar a súa oferta de produtos e servizos, de xeito individual ou conxuntamente con outras entidades.

As entidades interesadas en participar, deberán inscribirse a través da web: www.cooperativasdegalicia.coop, do correo electrónico: info@cooperativas2012.coop, ou do teléfono: 981 569 040